Ministria e Punëve të Jashtme e Republikës së Kosovës dhe British Council ftojnë qytetarët e Kosovës në vend dhe në diasporë që të marrin pjesë në garën e tretë tradicionale #InstaKosova, dedikuar imazheve më të mira nga Kosova të botuara në rrjetet sociale.
Gara organizohet çdo vit në kuadër të kremtimit të Ditës së Pavarësisë së Republikës së Kosovës, më 17 shkurt. Kjo garë do të zgjasë deri më 1 shkurt 2016.
“I ftojmë të gjithë që të publikojnë pamje të Kosovës, rajoneve, njerëzve, festave dhe ngjarjeve të ndryshme që kanë shënuar Kosovën në tetë vitet e fundit”, njofton MPJ.
Fotot e përzgjedhura si fituese në edicionet e shkuara të #InstaKosova nuk do të kualifikohen për në garën e sivjetme, ndërsa nga autorët e fotografive kërkohet që t’i titullojnë ato dhe të përfshijnë edhe datën e fotos.
Fotot duhet të postohen në rrjete sociale Facebook, Twitter, Instagram apo Flicker, me thurjen #InstaKosova apo #InstaKosovo.
Fotografia më e mirë do të shpërblehet me 500 euro, ndërsa autorët e 10 fotove më të mira do të fitojnë nga 50 euro. Njëqind fotot më të mira do të botohen në një libër ku do të përfshihen edhe fituesit e garës së vitit të kaluar #KosovoinUNESCO.
Përzgjedhja do të bëhet nga një juri e pavarur dhe profesionale.
Ky libër me imazhet më të mira të Kosovës, të promovuara nga vetë kosovarët, do të shpërndahet falas në ambasadat e Republikës së Kosovës në botë.
Gara #InstaKosova është pjesë e projektit të diplomacisë dixhitale, i sponsorizuar nga Ambasada e Mbretërisë së Norvegjisë në Kosovë dhe i zbatuar nga British Council. /PrizrenPress.com