NISMA për Kosovën – dega në Malishevë, ka kundërshtuar ashpër arrestimin deputetit të Kuvendit të Republikës së Kosovës, Enver Hoti (NISMA) dhe deputetëve tjerë nga opozita e bashkuar.
Përmes një deklarate, NISMA ka kërkuar lirimin e menjëhershëm dhe të pakusht të tyre, raporton PrizrenPress.
Deklarata e plotë e NISMA-s:
Në seancën e djeshme të Kuvendit të Republikës së Kosovës, u demonstrua dhuna e policisë dhe pjesëtarëve të sigurimit të kuvendit, karshi deputeteve të opozitës së bashkuar.
Për të satën herë u pa dhe u tregua qartë fytyra e koalicionit PDK-LDK.
Ky koalicion qeverisës që tashmë është faktuar se është shkelës i kushtetutës, përdori mekanizmat e tij të sigurisë, për ti privuar nga e drejta që deputetët e opozitës të jenë pjesë e seancës duke i larguar ata me forcë nga salla e kuvendit e më pas edhe duke i arrestuar ata.
Në mesin e deputetëve të arrestuar është edhe deputeti nga radhët e Nisma për Kosovën, z. Enver Hoti. Kundërshtojmë ashpër arrestimin e tij dhe të deputetëve tjerë nga opozita e bashkuar dhe kërkojmë lirimin e menjëhershëm dhe të pakusht të gjithë deputetëve nga opozita e bashkuar.
Edhe peticioni i nënshkruar nga mase dyqind mijë qytetarë, në kundërshtim të marrëveshjeve që qeveria e Republikës së Kosovës i ka nënshkruar në Bruksel, pastaj manifestimet paqësore të mbajtura dhe të organizuara nga opozita e bashkuar, si dhe protesta e nëntë janarit të këtij viti e sidomos protesta e fundit e shtatëmbëdhjetë shkurtit, treguan qartë se opozita e bashkuar me të drejtë është duke kërkuar dorëheqjen e kësaj qeverie dhe vendi të shkoj në zgjedhje pasi që kjo qeveri dhe ky kuvend e kanë humbur legjitimitetin dhe e kanë humbur të drejtën për të qeverisur me vendin.
Kërkojmë që menjëherë të ndalet përndjekja e deputetëve të opozitës së bashkuar, të lirohen të gjithë deputetët e arrestuar si dhe të ndalet degradimi i mëtejmë i jetës institucionale. /PrizrenPress.com/