Universiteti i Prizrenit “Ukshin Hoti”, shumë shpejt do të bëhet me shtatoren e veprimtarit dhe intelektualit Ukshin Hoti.
Kjo është bërë e ditur përmes një njoftimi për media nga Universiteti i Prizrenit, ku thuhet se sot do të bëhet vënia e gurthemelit të shtatores së tij për nder të ditëlindjes së tij të 73-ë.
“Ceremonia e përurimit do të zhvillohet më datën 17.06.2016, në orën 11:00, në oborrin e Universitetit “Ukshin Hoti” – Prizren”, thuhet në njoftim.
Ukshin Hoti, ka lindur më 17 qershor të vitit 1943 në Krushë të Madhe të Rahovecit. Ishte profesor, shkrimtar, filozof, intelektual, atdhetar dhe veprimtar i shquar i çështjes kombëtare në Kosovë gjatë viteve të ‘80-a dhe ‘90-a.
Rrëfimi i Maki Begolli, i mbijetuari i masakrës së Dubravës
Ukshin Hoti, ishte arrestuar disa herë për shkak të aktivitetit të tij atdhetar në Kosovë nga regjimi serb, por herën e fundit arrestohet në vitin 1994 nga policia serbe me akuzën e ushtrimit të aktiviteteve armiqësore kundra Jugosllavisë dhe për pjesëmarrjen e tij në lëvizjet për Republikën e Kosovës dhe më pas dënohet 5 vjet burg.
Më 16 maj të vitit 1999, pas lirimit të tij nga burgu dhe pas daljes nga qelia e burgut, Hoti zhduket nga polica serbe pa lenë gjurmë dhe nga ajo datë nuk dihet asgjë për të dhe njerëzit që e kanë parë të gjallë kanë qenë vetëm shokët e burgut dhe të burgosurit e tjerë të cilët kanë treguar se Ukshini, ishte liruar nga burgu ditën e diel, një ditë jo e zakonshme për lirimin e të burgosurve.