21 mijë e 114 maturantë kanë konkurruar për t’u regjistruar në Universitetin e Prishtinës “Hasan Prishtina” për vitin akademik 2013-14. Konkursi është përmbyllur të martën.
Zyra e Teknologjisë së Informacionit e këtij universiteti ka njoftuar se interesim më i madh i të rinjve edhe këtë vit është vërejtur për Fakultetin Ekonomik, në të cilin kanë konkurruar 3 mijë e 695 veta, i pasuar nga Fakulteti i Edukimit me 3 mijë e 19 të interesuar. Po ashtu, interesim i madh është vërejtur për Fakultetin e Mjekësisë, ku janë paraqitur 2 mijë e 500 të rinj.
Maturantët kanë shprehur interesim edhe për Fakultetin Juridik, në të cilin kanë konkurruar 1 mijë e 501 veta, në Fakultetin Filologjik 1 mijë e 970 veta dhe në Fakultetin Filozofik 1 mijë 926 veta.
Por, Universiteti i Prishtinës, në vitin e parë të studimeve, në afatin e parë të konkursit për vitin akademik 2013-2014 do t’i regjistrojë 11 mijë 932 studentë, prej të cilëve 9 mijë e 412 studentë të rregullt dhe 2 mijë 520 studentë me korrespondencë.
Universiteti do t’i regjistrojë edhe 323 studentë të rregullt nga Shqipëria, Maqedonia, Mali i Zi dhe Presheva e Bujanoci, si dhe 294 studentë nga minoritetet: boshnjakë, turq, romë, ashkali dhe egjiptianë.
Në Universitet mund të pranohen edhe studentët nga shtetet e tjera në bazë të kuotave të përcaktuara nga MASHT-i. Provimi pranues do të mbahet më 26 korrik në orën 9:00, kurse në disa fakultete, në atë të Inxhinierisë Elektrike dhe Kompjuterike dhe në Fakultetin e Inxhinierisë Mekanike, provimi pranues do të mbahet në orën 11:00.
Ndërsa në Fakultetin e Mjekësisë dhe në Fakultetin Ekonomik provimi pranues do të mbahet më 27 korrik në orën 9:00. Shpallja e rezultateve të provimit pranues do të bëhet më 30 korrik.