Lëvizja Vetëvendosje ka bërë thirrje për një bashkëpunim të ngushtë midis kryetarit të Komunës së Prizrenit, Shaqir Totaj, dhe Qeverisë së Republikës së Kosovës për realizimin e projekteve në dobi të qytetarëve.
Në një komunikatë për media, LVV shpreh mbështetje për çdo iniciativë që kontribuon në zhvillimin e komunës.
Sipas këtij subjekti politik, ish-objekti i ndërmarrjes “Liria”, i cili do të rrënohet nga Komuna e Prizrenit, është shpronësuar nga Qeveria e Kosovës.
“Shpronësimi ka pasur si qëllim implementimin e Projektit ‘Krijimi i hapësirave për lëvizshmërinë e trafikut dhe këmbësorëve’, duke përfshirë zgjerimin e rrugës ekzistuese sipas Hartës Zonale për Qytetin e Prizrenit,” .
Kryetari i Prizrenit, Shaqir Totaj ka njoftuar dje se pas përfundimit të procedurave të shpronësimit, më 8 tetor 2024 do të fillojë rrënimi i objektit të ish-ndërmarrjes “Liria” në lagjen “Bazhdarhane”.
“Hapësira e krijuar pas rrënimit do të shfrytëzohet për zgjerimin e rrugës, duke përmirësuar infrastrukturën rrugore në këtë zonë të rëndësishme të qytetit”, ka thënë ai.
Sipas tij, ky projekt “do ta lehtësojë trafikun dhe do të përmirësojë qasjen për banorët dhe vizitorët”.
Lëvizja Vetëvendosje, ndërkq mbështet çdo projekt që realizohet në interes të qytetarëve të Prizrenit.
“Ne falënderojmë Qeverinë e Republikës së Kosovës për kontributin e saj në shpronësimin e këtij objekti dhe për mundësinë e rrënimit, i cili do të krijojë hapësira për lëvizshmërinë e trafikut dhe këmbësorëve,” u shprehën nga LVV./PrizrenPress.com/
