Në një atmosferë solemne dhe me pjesëmarrjen e përfaqësuesve institucionalë dhe personaliteteve të shquara, sot u hap zyrtarisht Muzeu “Nënë Tereza” në Prizren. Ky moment historik u zhvillua në kuadër të shënimit të 17-vjetorit të Pavarësisë së Kosovës, duke i dhënë kësaj dite një domethënie të veçantë, përcjell PrizrenPress.
Muzeu, i dedikuar jetës dhe veprës së shenjtores shqiptare, përmban dokumente dhe fotografi që pasqyrojnë humanizmin dhe përkushtimin e Nënë Terezës ndaj njerëzimit. Si një institucion kulturor, ai synon të bëhet një qendër inspirimi dhe reflektimi për brezat e ardhshëm.
Përurimi i Muzeut “Nënë Tereza” jo vetëm që pasuron trashëgiminë kulturore të Prizrenit, por gjithashtu e bën atë një pikë tërheqëse për studiuesit, turistët dhe admiruesit e figurës madhështore të Nënë Terezës. Ky muze pritet të luajë një rol të rëndësishëm në promovimin e vlerave humanitare dhe shpirtërore të saj./PrizrenPress.com/
