Anëtarët e Kuvendit të Komunës së Prizrenit, në mbledhjen e mbajtur të enjten, kanë harmonizuar vendimin për miratimin e Planit Rregullues të Hollësishëm “Zona e Parkut për Industri të Lehtë në Prizren – Parku i Biznesit”, sipas Hartës Zonale të Komunës së Prizrenit, bazuar në kërkesën e MMPHI-së.
Gjatë shqyrtimit të kësaj pike të rendit të ditës, kryesuesja Antigona Berisha-Bytyçi ka bërë të ditur se MMPHI konform udhëzimit administrativ ka kërkuar që raporti i shqyrtimit publik të jetë pjesë e vendimit.
Anëtari i Kuvendit nga grupi i LDK-së, Marin Përgjokaj ka theksuar se është hera e katërt ose e pestë që ky organ e voton këtë plan.
“Në vazhdimësi kemi bërë kërkesa te zyra ligjore që aktet ti bëjnë konform ligjit, që mos të merremi disa herë me të njëjtën pikë”, ka thënë Përgjokaj.
Ngjashëm është shprehur edhe kuvendarja nga radhët e LVV-së, Dafina Alishani duke kërkuar sqarime nëse është marrë ndonjë masë ndaj atyre që janë përgjegjës për këto lëshime.
“Dikush duhet të jap përgjegjësi”, ka deklaruar Alishani.
Por drejtori i DUPH-së, Pranverim Berisha është përgjigjur duke thënë se në këtë rast MMPHI ka kërkuar dokumente shtesë që tani janë bashkëngjitur dhe se kësisoj akti harmonizohet me kërkesën e nivelit qendror.
Por ky koment nuk ka qenë i mjaftueshëm për opozitarët. “Nuk bën me na lajthit”, është shprehur kuvendarja Dafina Alishani. Ngjashëm si ajo edhe anëtarët tjerë të LVV-së kanë përkujtuar se zotimi i Ekzekutivit lokal ka qenë funksionalizimi i Parkut të Biznesit në 6 muajt e parë të qeverisjes.
Pavarësisht këtyre mospajtimeve, në favor të harmonizimit të këtij vendimi kanë votuar 32 kuvendarë.
Zyrtarët komunalë muaj më parë patën theksuar se procedurat ligjore lidhur me Parkun e Biznesit planifikohet të përmbyllen deri në fund të vitit 2024, në mënyrë që prej fillimit të vitit 2025 të nis vendosja e bizneseve prodhuese.
Procesi i krijimit të Zonës Ekonomike në Prizren pati filluar para më shumë se një dekade dhe përgjatë disa mandateve në këtë hapësirë janë investuar mjete të konsiderueshme financiare nga buxheti i Komunës së Prizrenit. /Telegrafi/
