Të premten e kaluar në Prizren nisi seminari “Lumbardhi 101: Si të jetojmë në botën e lumit”, një nismë që synon të hapë një debat të ri mbi marrëdhënien e qytetit me lumin Lumbardh. Në ditën e parë të seminarit u zhvilluan biseda të hapura, diskutime të gjalla dhe momente reflektimi mbi të ardhmen e këtij elementi të rëndësishëm natyror e kulturor për jetën e përditshme në Prizren.
Lumi Lumbardh ka qenë historikisht një pjesë thelbësore e zhvillimit social dhe ekonomik të qytetit, dhe në këtë seminar po eksplorohen qasje të reja për një bashkëjetesë më të qëndrueshme me të.
Në panelin e ditës së parë morën pjesë emra të njohur nga fusha të ndryshme, si Stephen Cowley, Fisnik Eger, Nebi Bardhoshi, Ferdi Limani, Artnet Haskuka dhe Blerina Kanxha, të cilët ndanë perspektiva shkencore, kulturore dhe qytetare mbi çështjet që lidhen me ruajtjen, menaxhimin dhe përfshirjen e lumit në jetën urbane.
Seminari është organizuar nga Fondacioni Lumbardhi në bashkëpunim me Universitetin e Danimarkës Jugore dhe Universitetin e Prizrenit, ndërsa mbështetet nga European Culture Foundation dhe programi ‘EJA Kosovë’ i Fondacionit Kosovar për Shoqëri Civile (KCSF), bashkëfinancuar nga Agjencia Zvicerane për Zhvillim dhe Bashkëpunim (SDC) dhe Suedia. Po ashtu, puna e Fondacionit Lumbardhi mbështetet me përkrahje institucionale nga Ministria e Kulturës, Rinisë dhe Sportit dhe Rockefeller Brothers Fund./PrizrenPress.com
