Në 33-vjetorin e rënies heroike të Alush Kryeziut, të shtunën në lagjen “Ortakoll” të Prizrenit, u organizuan homazhe për të nderuar figurën e tij. Familjarë, miq, bashkëveprimtarë dhe ish-eprorë të Ushtrisë Çlirimtare të Kosovës morën pjesë në këtë ngjarje përkujtimore, duke bërë homazhe te lapidari i vendit ku Alushi dha jetën për lirinë e Kosovës.
Bashkëveprimtarja e dëshmorit, Shqipe Rexha, tha se emri i Alushit do të përkujtohet dhe nderohet për shekuj të tëra. I pranishëm në këtë ngjarje ishte edhe ish-komandanti i UÇK-së, Ruzhdi Saramati, i cili theksoi se fjalët janë të pakta për të përshkruar veprimtarinë e dëshmorit Alush Kryeziu.
Në emër të familjes, të gjithë ata që nderuan dëshmorin i ka falënderuar djali i tij, Petriti, i cili tha se sakrifica e të gjithë dëshmorëve na shërben si amanet për ta dashur atdheun më shumë dhe për të punuar me nder e drejtësi.
Alush Kryeziu, për veprimtarinë e tij atdhetare, u kishte rënë në sy të spiunëve dhe, në mesnatën e datës 19 prill 1992, në lagjen “Ortakoll”, atij i vihet prita, ku qëllohet pas shpine me plumba nga policë serbosllavë. Duke mos i mbijetuar plagëve vdekjeprurëse, ai dha jetën për liri, pasi kishte qëndruar gjatë i plagosur dhe pa ndihmë. Kumti pikëllues për vrasjen pas shpine të Alushit e mbuloi tërë Prizrenin, rrethinën dhe mbarë popullin shqiptar të Kosovës./tv prizreni
