Në kuadër të projektit KSV/017, të zbatuar nga LuxDev, në Spitalin e Përgjithshëm ‘Prim. Dr. Daut Mustafa’ në Prizren është mbajtur një punëtori për vlerësim dhe planifikim të zhvillimit të kardiologjisë invazive.
Punëtoria u organizua të mërkurën, me pjesëmarrjen e menaxhmentit të spitalit, kardiologëve nga Spitali i Përgjithshëm i Prizrenit dhe QKUK, ekipit të repartit të kirurgjisë, si dhe ekipit të projektit KSV/017, i udhëhequ nga Dr. Afërdita Osmani Ademi, raporton PrizrenPress.
Sipas njoftimit të spitalit, “gjatë punëtorisë është prezantuar puna dhe progresi në laboratorin e kateterizimit në Spitalin e Përgjithshëm të Prizrenit që nga hapja e tij. Po ashtu, është theksuar rëndësia e grumbullimit dhe analizimit të të dhënave si parakusht për përmirësimin e cilësisë dhe sigurisë së shërbimeve.”
Diskutimet janë fokusuar edhe në të ardhmen e kardiologjisë invazive në këtë institucion.
“U trajtua gjithashtu identifikimi i nevojave për zhvillimin e mëtejshëm të shërbimeve të Kardiologjisë invazive (CathLab) në Spitalin e Përgjithshëm ‘Prim. Dr. Daut Mustafa’ në Prizren”, thuhet më tej në njoftim./PrizrenPress.com
