Kryetari i degës së AAK-së në Prizren ka vlerësuar se lidhja e koalicionit parazgjedhor me Nismën Socialdemokrate ka qenë gabim i rëndë. Për këtë arsye ka kërkuar falje nga votuesit dhe përkrahësit e AAK-së.
“Gabimi më i rëndë i kësaj periudhe ishte lidhja e një koalicioni të panatyrshëm me të majtët e Nismës Socialdemokrate. Ky bashkëpunim ishte një devijim nga vlerat dhe identiteti ynë politik – dhe për këtë përgjegjësinë e marrim ne, kryesia dhe kryetari së bashku”, është shprehur Krasniqi.
Sipas tij, Aleanca është një forcë politike e qendrës së djathtë, e ndërtuar mbi parime të qarta, mbi traditë kombëtare, përgjegjësi dhe integritet dhe se largimi nga këto vlera është një shkelje ndaj besimit të votuesve e përkrahësve të AAK-së.
Në të njëjtën kohë ka shprehur qëndrimin se Aleanca do të vazhdojë të forcohet si një zë i fuqishëm dhe i besueshëm i djathtës shqiptare.
“E ardhmja jonë është në qëndrueshmëri, jo në pazare”, ka përfunduar Krasniqi.
Në zgjedhjet e këtij viti për Kuvendin e Kosovës, koalicioni AAK, Nisma Socialdemokrate, Konservatorët, Intelektualët ka marrë 66 256 vota ose 7,06%. Nga tetë deputetët e zgjedhur të këtij koalicioni 5 janë nga AAK-ja dhe 3 nga Nisma Socialdemokrate. Sinjalet e kësaj të fundit se mund të përfshihet në koalicion me LVV-në ka ndikuar në ftohjen e raporteve me AAK-në. /Telegrafi/
