Nën përkujdesjen e kryetarit të Komunës së Malishevës, Ekrem Kastratit, vazhdojnë aktivitetet për shënimin e 16 qershorit – Ditës së Çlirimit dhe të Dëshmorëve të komunës dhe të kombit shqiptar të UÇK-së.
Në një ngjarje të veçantë kulturore, u bë përurimi i shtatë veprave të reja letrare dhe historike të autorit të njohur Ramadan Krasniqi. Aktiviteti u mbajt në ambientet e Klubit të Kulturës në Malishevë, në prani të dashamirëve të librit, studiuesve, arsimtarëve dhe përfaqësuesve të institucioneve lokale. Organizatori ishte Shoqata e Kulturës “Tafil Kelmendi”, raporton PrizrenPress.
Takimin e përshëndeti kryetari i Komunës së Malishevës, Ekrem Kastrati, i cili vlerësoi kontributin e autorit Krasniqi në ruajtjen dhe pasurimin e trashëgimisë sonë kulturore, historike dhe letrare.
“Veprat e z. Krasniqi janë dëshmi e një përkushtimi të vazhdueshëm për të ruajtur historinë dhe për të edukuar brezat e rinj përmes fjalës së shkruar”, u shpreh Kastrati.
Gjatë përurimit, u prezantuan temat dhe përmbajtjet e veprave të reja, të cilat trajtojnë motive kombëtare, figura të shquara historike dhe ngjarje me rëndësi për popullin shqiptar. Për këto vepra folën recenzentet.
Ngjarja u përmbyll me diskutime dhe vlerësime nga të pranishmit, të cilët e konsideruan autorin Ramadan Krasniqi një zë të rëndësishëm në letërsinë dhe historinë bashkëkohore shqiptare. Edhe autori falënderoi të pranishmit./PrizrenPress.com
Marketing
