Vetëm pak ditë i janë dashur Prokurorisë së Shtetit që t’i bie pishman publikimit të aktakuzave për korrupsion në webfaqen e vet, raporton KTV.
Qindra aktakuza ishin bërë publike për gazetarët dhe qytetarët në fund të nëntorit, por ato u larguan nga webi vetëm pak ditë pas kësaj. Kjo ishte bërë pas shumë deklarimeve të Prokurorisë për transparencë. Por, pos kësaj nuk janë treguar transparentë as kur i është kërkuar arsyetimi zyrtar për këtë nga KTV-ja. Liridona Kozmaqi, zëdhënëse e PSRK-së, ka sugjeruar që të pyetet Ekrem Lutfiu, zëdhënës në KPK, meqë ajo nuk është kompetente për këtë çështje, transmeton koha.net
E zëdhënësi Lutfiu nuk ka kthyer përgjigje kurrë, pavarësisht se kishte thënë se do ta bënte një gjë të tillë, e pasdite e ka mbyllur telefonin dhe nuk është përgjigjur fare.
Kohavisioni ka mësuar se Prokuroria është arsyetuar se po shkelen të dhënat personale me publikimin e këtyre aktakuzave. Por, Agjencia shtetërore për mbrojtjen e të dhënave personale kundërshton këtë dhe thonë se kanë kontaktuar me Prokurorinë, e cila është dashur të konsultohet me këtë Agjenci kur vendosi t’i largoj nga webfaqja aktakuzat.