Homazhet për vokalistin e grupit të njohur “Djemtë e Detit”, Gentian Demaliaj i cili ka ndërruar jetë në moshën 40- vjeçare, do të zhvillohen në orën 12:30 në ambjentet e RTSH, raporton Shqiptarja. Demaliaj u nda nga jeta pasi vuante prej kohësh nga tumori.
Mos qaj, mos qaj; Mos qaj për vdekjen o njeri; I lënë, (i lënë), mënjanë; Ky ishte fati yt i zi… ishin vargjet e këngës “Mos qaj” që bëri për vete brezin e ri dhe të vjetër, një baladë e cila padyshim që mund të hyjë në antologjinë e rrokut shqiptar nëse një ditë do të realizohet në Shqipëri. Vokalisti i grupit të njohur “Djemtë e Detit”, Gentian Demaliaj ka ndërruar jetë dje në moshën 40- vjeçare pasi vuante prej kohësh nga tumorri. Në vitin 2013 ai u diagnostikua me kancer dhe që atëherë ai bënte vazhdimisht kimioterapi në Tiranë dhe Itali. Po në vitin 2013, më 10 prill me vendim të Këshillit të Ministrave u akordua edhe një fond i veçantë për këngëtarin e njohur për një kurim më të specializuar jashtë shtetit. Qeveria shqiptare akordoi shumën prej 3.5 milionë lekësh për kurimin e tij, por as leku nuk mjaftoi për ta mbajtur në jetë legjendën e rrokut shqiptar.
Balada për Jakup Ferrin
Gentian Demaliaj dhe grupi i tij “Djemtë e Detit” është krijuar në vitin 1990. Grupi nga Lezha do të shënonte edhe portretin e tyre me baladën për Jakup Ferrin, këngë e cila befasoi jo vetëm publikun, por tronditi edhe artistët e skenës shqiptare. Ndërsa në vitin ’97 ata rikthehen me një tjetër goditje me këngën “Mos qaj”, baladë e cila i kushtohet dhimbjes njerëzore dhe fatit të rinjëve shqiptar që përjetuan gjatë viteve ’95 – ’97. në atë koha kënga “Mos qaj” u bë refren i problemeve sociale që shoqëria shqiptare po përjetonte gjatë periudhës post-komuniste. Ndërkohë, në fund të viteve 1998 grupi “Djemtë e Detit” u shpërbën dhe Genti iu drejtua një tjetër ëndrre, aktrimit. Eksperienca e parë në film erdhi në “Lule të kuqe, lule të zeza”, duke u ndjekur kështu me muzikalin
“Rome dhe Zhulieta” apo bashkëpunimin me Elsa Lilën.
Krijimtaria
“Djemtë e Detit”, është një nga grupet e rrokut shqiptar krijuar që në vitin 1990, dhe që mbase është ndër të rrallët që vjen jashtë Tiranës dhe që ka patur sukses. I krijuar në Lezhë, muzika e tyre e hershme kishte ndikime të qarta nga hard-rroku dhe metalin, që ishte shumë aktual në mesin e viteve ’80 në të gjithë botën. Grupi “Djemtë e Detit” kanë marrë pjesë në shumë koncerte dhe festivale dhe sigurisht çmimet nuk kanë munguar, kanë dalë në krye në festivale rroku, si dhe janë vlerësuar nga vetë publiku. Albumi i parë në karrierën e tyre muzikore është “Izolimi vdes”, i cili përmbledh krijimet e tyre. Ndërsa, gjatë viteve 2000 me rikthimin e grupit ata sollën edhe albumin “Epos”.