Universiteti i Prishtinës “Hasan Prishtina”, i cili sivjet do të pranojë rreth 12 mijë studentë të rinj, në kudër të këtij numri do të përfshihen edhe studentët e tri universiteteve të reja publike, atij të Gjilanit, Gjakovës dhe Mitrovicës. Këto universitete nuk kanë mundur të organizojnë konkurse, pasi ende nuk janë zgjedhur drejtuesit e tyre dhe janë në themelim.
Nga numri prej 12 mijë studentëve që do të pranohen këtë vit akademik në Universitetin “Hasan Prishtina”, 1 mijë e 400 prej tyre do të jenë pjesë e Universitetit të Gjilanit, 350 do t’i takojnë Universitetit të Gjakovës dhe 630 do të pranohen në Universitetin e Mitrovicës. Këtë konkurs nuk kanë mundur ta organizojnë universitetet e reja veç e veç, pasi janë ende në themelim.
Këshilltari i lartë politik në Ministrinë e Arsimit, Naser Mrasori, tha për Radio Kosovën se në bazë të praktikave me universitetet e tjera publike, konkursi bëhet në kuadër të Universitetit të Prishtinës për të ndihmuar universitetet në themelim.
“Mendoj që është një ndihmesë dhe jo pengesë pse provimet pranuese realizohen në kuadër të Universitetit të Prishtinës. Unë e shoh si ndihmesë që iu është bërë këtyre universiteteve dhe studentët do të vijojnë prej 1 tetorit studimet në institucionet përkatëse, Gjilanit, Gjakovës dhe Mitrovicës”, tha ai.
Universiteti i Prishtinës ka pasur departamente nëpër këto qendra. Mrasori thotë se këtë vit akademik do të fillohet po me ato programe që kanë qenë deri tani, ku më vonë do të bëhen propozimet edhe për programe të reja.
“Këshilli themelues tashmë ka filluar përgatitjen e statuteve të përkohshme dhe rregulloret e brendshme të universiteteve përkatëse, kështu që me kalimin e kohës do të bëjnë propozime edhe për hapjen e programeve të reja. Së pari natyrisht që do të shkojnë përmes akreditimit, duke kryer të gjitha procedurat dhe pastaj të bëhet hapja” , tha ai.
Ndërkohë, rektorët e tri universiteteve në themelim ende nuk janë zgjedhur për të udhëhequr këto institucione. Sipas Mrasorit, kjo varet nga dinamika e punës, ku pasi të nënshkruhen statutet nga Ministri i Arsimit, do të shpallen edhe konkurset për drejtuesit e këtyre universiteteve. Ai shpreson se rektorët e rinj do të fillojnë punë me 1 tetor të këtij viti. Drejtuesit e bordeve të Universiteteve të reja publike janë: në Gjilan, Arben Demaku, në Gjakovë, Bajram Nuraj dhe në Mitrovicë, Alush Musa.