Shefi i EULEX-it, Gabriele Meucci, sipas Nismës për Kosovën, e ka akuzuar të enjten “Kohën Ditore” se e ka mision shkatërrimin dhe dëbimin e EULEX-it nga Kosova, shkruan sot Koha Ditore.
Mbi këtë bazë e ka bërë të qartë se misioni që drejton refuzon të kryejë hetime për dyshimet se ka pasur ndërhyrje politike në rastin “Kleçka”.
Gjatë një takimi që ka pasur me drejtuesit e Nismës, Meucci citohet të ketë thënë se faktet e prezantuara në gazetë, siç janë komunikimet elektronike dhe bisedat e incizuara në audio, janë trillime të gazetarit.
Meucci dhe shefi i Zyrës së BE-së në Kosovë, Samuel Zhbogar, kanë takuar kryetarin e Këshillit Kombëtar të Nismës, Jakup Krasniqi, sekretarin e këtij subjekti, Bilall Sherifi, dhe shefen e Grupit parlamentar, Valdete Bajrami.
Takimi është mbajtur në zyrat e BE-së në Kosovë pak ditë pas raportimit të “Kohës Ditore” se në shtatorin e vitit të kaluar kishte një plan për dënimin e Fatmir Limajt me qëllim të prishjes së koalicionit LDK, AAK dhe Nisma.
Partia Demokratike e Hashim Thaçit në bashkëpunim me ish-shefin e EULEX-it, Bernd Borchardt, dhe disa zyrtarë të Brukselit, besohet se kishin ndërhyrë në Gjykatën e Apelit me qëllim që Limaj dhe nëntë të tjerët të akuzuar në rastin “Kleçka” të dënoheshin për krime lufte. Kjo përpjekje e tyre dëshmohet nga disa shkëmbime e-mailesh dhe një denoncim i bërë nga një zyrtar i EULEX-it.