Asociacioni i Gazetarëve të Kosovës ka reaguar pas kërcënimeve që i kanë bërë drejtuesit e EULEX-it gazetës Koha Ditore.
AGK-ja shprehet e shqetësuar me deklarimet e përfaqësuesve të misionit për sundimin e ligjit në Kosovë Eulex, kundër punës së gazetarit të Kohës Ditore, Vehbi Kajtazi. Asociacioni i Gazetarëve të Kosovës vlerëson se një qasje e tillë cenon lirinë e shprehjes në Kosovë dhe pengon përpjekjet e gazetarëve për të trajtuar në mënyrë profesionale fenomenet e ndryshme.
“Gazetarët dhe mediat nuk kanë mision shkatërrimin e institucioneve por raportimin e bazuar në fakte. AGK-ja, ka përcjellë në vazhdimësi raportin e zyrtarëve të Eulexit me punën e gazetarit të Kohës Ditore, andaj i bënë thirrje përfaqësuesve të Eulexit që të kërkojnë falje publike lidhur me presionin e ushtruar ndaj Kajtazi dhe gazetës Koha Ditore. Asociacioni i Gazetarëve kundërshton çdo lloj presioni mbi gazetarët dhe shpreh bindjen se ndërhyrjet në punën e gazetarëve është kundër interesave të përgjithshme shoqërore”, thuhet në reagim.