Këshilli Drejtues i Teatrit Kombëtar të Kosovës e ka shpërfillur Rregulloren për ndarjen e çmimeve për dramë origjinale shqipe “Katarina Josipi”.
Këtë e ka bërë duke marrë vendim që konkursi të jetë mbarëkombëtar, përderisa me Rregulloren e vitit 2013 përcaktohet që laureatë të çmimit mund të jenë vetëm shtetasit e Kosovës.
Këshilli Drejtues i TKK-së përmes një kumtese për media të titulluar “Riformulohen kriteret për konkursin për dramë ‘Katarina Josipi’, kanë lajmëruar për ndryshimin e rregullave që në fakt janë rikthimi i atyre të vjetrave, prejse u rithemelua çmimi, më 2008.
“Teatri Kombëtar i Kosovës ka ridefinuar disa nga kriteret për konkursin për dramë ‘Katarina Josipi’. Nga sivjet konkursi sërish do të jetë i hapur për të gjithë autorët shqiptarë, kudo që jetojnë e krijojnë”, shkruan në kumtesën e Këshillit Drejtues të institucionit më të lartë teatror në vend.
Në këtë njoftim ndryshimi i kritereve arsyetohet me qëllimin e pasurimit të konkursit me drama më cilësore dhe në të njëjtën kohë t’i mundësohet Teatrit Kombëtar të jetë në kontakt me dramaturgjinë shqipe që shkruhet nga autorë shqiptarë edhe jashtë Kosovës.
“Këto dhe kriteret e tjera të konkursit do të bëhen publike në muajin prill. Teatri Kombëtar shpreson që sivjet të marrë drama më cilësore shqipe”, shkruan në kumtes