(I plotësuar) Para pak çastesh është ndërprerë përkohësisht protesta e veteranëve të luftës së UÇK-së e cila po mbahet para ndërtesës së parlamentit të Kosovës.
Ndërprerja e saj u bë deri në rinisjen e punimeve të seancës së Kuvendit pas shkuarjes së deputeteve në pauzë.
Protestuesit kërkojnë të largohet Policia
Protesta e veteranëve në oborrin e Kuvendit të Kosovës po vazhdon, ndërkohë protestuesit kanë kërkuar që të largohet policia.
Sekretari i Faton Klinaku shtoi se ata kanë marrë disa informatat se kryetari i kuvendit i ka bërë thirrje që policia të largohet nga oborri i kuvendit dhe ta lëshoj rrugën.
“Megjithatë policia po vazhdon të bën roje edhe pse ne nuk kemi dal të bëjmë skandale por t’i vetëdijësojmë deputet për mos votimin e Gjykatës Speciale. Pra, edhe një herë i bëjmë thirrje policisë të largohet nga këtu”, tha Klinaku.
Faton Klinaku, sekretar OVL-së ka thënë se është turp për deputet e Kosovës një ligj të tillë.
“Përderisa Serbia ka shkaktuar gjenocid ndaj popullatës civile, nuk duhet të kemi frikë nga askush se votën e kanë nga populli dhe është mirë që gishtin ta vënë ne kokë e të mos i bëjnë keq Kosove”, ka thënë Klinaku.
Ndërsa Milami Gashi, nga Klina, familjarë i dëshmoreve i ka bërë apel deputetëve që mos ta votojnë Specialen.
“Është në dëm të Kosovës dhe është e një anshme”, ka thënë Gashi.
Edhe përfaqësuesit e invalidëve të luftës i kanë porositur deputetet që mos ta votojnë dhe të dalin jashtë që t’i bashkëngjiten atyre në protesta.