Drejtoria e Arsimit në Komunën e Suharekës ia kishte marrë orët e mësimit mësueses Drita Veselaj duke ia dhënë një mësimdhënësi tjetër. Komisioni për ankesa kishte aprovuar ankesën e saj dhe obligonte Drejtorinë t’ia kthejë asaj orët.
Drejtoria e Arsimit nuk e ka zbatuar këtë vendim.
Mësuesja Drita Veselaj thotë se tash e disa vite nuk po e lejojnë ta plotësojë normën e orëve.
“Katër orë m’i kanë marrë, që disa vite mua nuk po me lejojnë me plotësu normën, 11 vite i kam punë, nëntë i kam në këtë shkollë. Fatkeqësisht nuk kam guxuar me ardhur nga ajo që kam padrejtësi këtu. Arsyeja është për shkak se e kanë lëshuar një vendim, që mua më takojnë ato orë, mirëpo as që është realizuar dhe nuk është marrë për bazë”, tha ajo.
Puna shkoi edhe në gjykatë. Kjo e fundit vendosi që vendimi i komisionit është i plotfuqishëm dhe duhet të zbatohet nga komuna.
Zëdhënësi i Komunës së Suharekës Reshat Reshitaj, duke cituar fjalët e drejtorit të Arsimit, tha se mësuesja në fjalë ka më shumë orë se që kishte më parë.
“Drita Veselajt, jo që nuk iu kanë marrë orët, por e njëjta ka edhe me tepër tash, këtë ma tha drejtorit i Arsimit”, tha për kallxo.com zëdhënësi Reshta Reshitaj.
Por Drita Veselaj thotë se orët ende nuk iu kanë kthyer.