Një 19-vjeçar ka mbetur i plagosur me armë zjarri dje në qytetin e Durrësit. Ngjarja u shënua në mesditë në lagjen numër 14 në Shkozet, në një servis automjetesh. 19-vjeçari Xheni Peposhi është qëlluar me pistoletë e llojit TT duke marrë plagë në trup. I plagosuri u transportua në spitalin e Durrësit dhe sipas mjekëve ndodhet jashtë rrezikut për jetën.
Ndërkohë, 6 orë pas krimit, specialistët për Krimet në Komisariatin e Policisë Durrës bënë të mundur arrestimin në flagrancë të autorëve të dyshuar, të cilët janë vëllezërit Endri Lushaku, 20 vjeç dhe S.Lushaku, 16 vjeç, banues në Shkozet. Forcat e Policisë kanë gjetur dhe kanë sekuestruar në cilësinë e provës materiale një gëzhojë pistolete. Mësohet se konflikti mes të rinjve kishte nisur disa muaj më parë, transmeton Shekulli.
Çështja kaloi në Prokurori dhe dy protagonistët e ngjarjes së sotme u lanë të lirë. Por duket se gjërat mes të palëve nuk kanë shkuar mirë, pasi janë takuar sot në pikën e servisit, ku janë konfliktuar rëndë, çka përfundoi në plagosjen e 19-vjeçarit me armë.