Mbledhja e Këshillit të Sigurimit të OKB-së është shndërruar në një arenë përplasjesh mes ministrit të Jashtëm të Kosovës, Hashim Thaçi, dhe homologut të tij serb, Ivica Daçiç.
Kjo pasi diplomati serb në fjalimin e tij është ankuar për shkelje të të drejtave të serbëve në Kosovë si dhe për pasiguri të tyre. Ndërkohë që Thaçi i është kundërpërgjigjur Daçiqit duke i thënë se Serbia është ajo që ka kryer krime në Kosovë dhe se institucionet e Kosovës tani janë duke u angazhuar që të ndërtojnë një shtet multienik.
Në seancën e së premtes, Këshilli i Sigurimit i Kombeve të Bashkuara shqyrtoi raportin mbi zhvillimet tremujore në Kosovë të Sekretarit të përgjithshëm, Ban Ki-moon.
Ban Ki-moon në raport ka shprehur shqetësimin për vonesën e krijimit të Gjykatës Speciale, me ç’rast thotë se kjo “minon imazhin e Kosovës për të vendosur një shembull drejtësie dhe llogaridhënie”.
Daçiq: Prizreni ishte kryeqytet i Serbisë
Ministri i Punëve të Jashtme të Serbisë, Ivica Daçiq, ka thënë se serbët janë të pasigurt në Kosovë, duke iu drejtuar asaj si “krahinë”. Daçiq vazhdimisht e ka paraqitur popullin serb si viktimë në Kosovë.
“Prizreni në shekullin 14 ishte kryeqyteti i Serbisë, ndërsa sot ka vetëm 21 serbë”, ka deklaruar ndër të tjera Daqiq.
Ish-kryeministri serb më tej duke folur për Kosovën si pjesë të Serbisë, ka thënë se ai ka lindur në Kosovë, kurse homologu i tij kosovar, Hashim Thaçi, iu përgjigj duke i thënë se ai mund të vijë në Kosovë dhe ta marrë pasaportën e Republikës së Kosovës.
Daçiq po ashtu ka folur edhe për shkuarjen e kosovarëve në Siri dhe Irak, duke e cilësuar këtë si rrezik për serbët.
Shefi i diplomacisë serbe, Ivica Daçiq, ka folur edhe për anëtarësimin e Kosovës në UNESCO. Ai ka ripërsëritur kundërshtimin e tij kundër këtij anëtarësimi duke thënë se këtë nuk e lejon as Rezoluta 1244.
“Një numër të rasteve i kam theksuar për konstruktivitetin e udhëheqjes së Serbisë. Ne jemi duke u ballafaquar me kërkesën e Prishtinës për t’u kyçur në organizatat ndërkombëtare që janë të papranueshme për Serbinë. Në UNESCO, e cila sipas Rezolutës 1244 nuk mund të merret si shtet dhe nuk mund të njihet nga ajo organizatë”, ka shtuar Daçiq.