Republika, e rrezikuar nga mungesa e sundimit të ligjit
Sunduesit e drejtësisë po e mbajnë peng Kosovën
Profesori Riza Smaka ka pohuar se qytetarët e shohin nevojë imediate pastrimin e kësaj skene politike nga të gjithë të inkriminuarit, por derisa krimi e ka kapur majën e pushtetit dhe nuk ka se kush t’i kundërvihet, është vështirë të ndodhë një pastrim i tillë
Pasojat e krizës politike në vend, si rrjedhojë e bllokimit të institucioneve, sipas analistëve, më së tepërmi po hetohen në fushën e sundimit të ligjit. Subjektet në pushtet, por edhe ato të opozitës, me këtë krizë që po zgjat në këta muajt e fundit, po përfitojnë në kohë duke lënë në harresë shumë procese për të cilat vendi nuk pret.
Kriza ka ndikuar te ngecja e çdo nisme për hartimin e Ligjit mbi Dekriminalizimin e politikës dhe të pushtetit në të tri shtyllat kryesore dhe në të gjitha nivelet e tjera, njëkohë- sisht edhe procesin tjetër me rëndësi që gjithashtu ndërlidhet me pastrimin e skenës politike nga krimi dhe korrupsioni. Mosfillimi i punës së Gjykatës Speciale, që pritet ta pastrojë politikën dhe oligarkinë e inkriminuar për shume vjet në këtë situatë të mbajtjes peng të fuqizimit të sundimit të ligjit, duket i qëllimshëm nga politikanët e papërgjegjshëm, të korruptuar e të inkriminuar.
Analisti politik, Faik Krasniqi ka pohuar se Kosova prej pasluftës ka mbetur peng i kriminelëve, hajnave, banditëve dhe profiterëve të korruptuar të politikës dhe parapolitikës. “Edhe sikur të mos kishim këtë krizë politike, dekriminalizimi i pushtetit nuk do të ndodhte kurrë, sepse pushteti dhe skena politike është në duart e mu atyre që do të duhej të largoheshin nga skena politike dhe të burgoseshin për krimet e tyre. Prandaj, është vështirë të ndodhë dekriminalizimi i pushtetit dhe institucioneve shtetërore”, tha ai./kosova sot/