Hamami i Gazi Mehmed Pashës gjendet në Qendrën Historike të Prizrenit, pranë Xhamisë së Kukli-Mehmed Beut dhe Xhamisë së Emin Pashës
Hamami është një tjetër pikë referimi për turistët që mësyjnë Prizrenin. Përveç kalasë dhe objektit të Lidhjes Shqiptare të Prizrenit, ky monument i trashëgimisë kulturore të qytet është ndër më të vizituarit. Hamami i Gazi Mehmed Pashës gjendet në Qendrën Historike të Prizrenit, pranë Xhamisë së Kukli-Mehmed Beut dhe Xhamisë së Emin Pashës.
Studiuesi Mejdi Elezi shprehet se hamami është ndërtuar në mes të viteve 1563-1574, nga Gazi Mehmet Pasha, Sanxhakbej i Shkodrës. Në portën kryesore është vendosur pllaka me mbishkrim, e cila tregon datën e restaurimit të hamamit nga ana e vëllezërve Tahir dhe Mehmed Pashë Rrotulli në vitin 1833. “Hamami gjendet në kuadër të ansamblit arkitektonik të themeluar nga Gazi Mehmet Pasha, ku gjenden Xhamia e Bajraklisë, medreseja apo shkolla e mesme, mejtepi apo shkolla fillore, biblioteka dhe tyrbja”, thotë Elezi.
Legjenda si nisi ndërtimi i hamamit
Sipas gojëdhënave, thuhet se gjatë ndërtimit të Xhamisë së Bajraklisë, një mëngjes Gazi Mehmed Pasha gjatë një kontrolli rutinor të punimeve në xhami vëren se një kryepunëtor po e zhvendoste një gur disa herë nga themelet e xhamisë. Në pyetjen se pse po e bënte këtë, ai kishte thënë se në gjumë ishte bërë për t’u larë dhe se s’ishte i bindur se po ta vendoste gurin në themelet e xhamisë do të bënte mëkat. Pasi që e dëgjon këtë, Gazi Mehmed Pasha urdhëron ndërprerjen e punimeve në xhami dhe urdhëron ndërtimin e hamamit. Punimet në ndërtimin e xhamisë rifillojnë vetëm pasi të përfundojë hamami. /kosova sot/