Kryevepra e dramaturgut rus Anton Çehov, shfaqja “Tri motrat”, do të vihet për herë të parë në skenën e Teatrit Kombëtar në Tiranë.
Kjo shfaqje sjell përditshmërinë e jetës me trishtimet, dramat, dashuritë dhe vepra e Çehov-it në këtë rast i ngjan edhe shoqërisë shqiptare falë universalitetit të krijimit.
“Punuar nga regjisori Hervin Çuli që ka një koncept regjisorial të hapësirës dhe ngushtësisë, të kohës dhe pakohës, të plotësisë dhe hiçit, ‘Tri Motrat’ prezantohet për publikun në një skenografi që e tejkalon skenën dhe zbret në sallë, aty ku personazhet-aktorë frymojnë pranë publikut”, thuhet në njoftimin e Ministrisë së Kulturës në Shqipëri.
Drama e trishtuar me elementë komedie rrëfen jetët e tri motrave Prozorov. Olga, Masha dhe Irina që digjen nga dëshira për të ikur nga qyteti i vogël rus dhe të kthehen në Moskë, ku janë rritur.
Në këtë shfaqje interpretojnë aktorët Flaura Kureta, Anila Bisha, Gladiola Harizi, Erjona Kakeli, Elia Zaharia, Indrit Çobani, Lulzim Zeqja, Olta Gixhari, Ina Gjonçi, Naum Shundi, Helidon Fino, Neritan Liçaj, Gerti Ferra, Bujar Asqeriu,Reael Hoxha, Genti Deçka, Mehdi Malka dhe Natasha Sela.
Premiera jepet më 20 janar me fillim nga ora 19:00 kurse shfaqja reprizohet edhe më 21, 22, 23, dhe 24.