Rruga “Remzi Ademaj” në Prizren, do të mbyllet për një muaj,për shkak punimeve në sistemin e ujërave të zeza.
Zyrtari i Drejtorisë së Shërbimeve Publike në Prizren, Përparim Shala tha se punimet në këtë rrugë fillojnë nesër, ndërkaq përfundojnë me 25 prill.
Zëdhënësi i Policisë në Prizren Hazir Berisha, tha se policia ka marrë masa të shtuara për rregullimin e qarkullimit të automjeteve në komunikacion, pas mbylljes së rrugës brenda qytetit.
Gjatë kohës sa do të zgjasin punimet, autobusët ndërurban dhe automjetet e rënda, që hyjnë në qytet nga pjesa jugore, do të lëvizin në rrugën “ Tirana”, deri tek Stacioni i Autobusëve, ndërsa shkuarja për Prishtinë do të bëhet përgjatë rrugës magjistrale për në Gjakovë, dhe më pas mund të kalojnë në rrugën e transitit.
Ndërkaq, autobusët lokal do të qarkullojnë përmes rrugës “ Joni” dhe asaj “ Zahir Pajaziti”.
Rruga do të bllokohet në afërsi të Urës së Re, prapa “Beledijes”, ndërsa veturat që qarkullojnë në “Urën e Soziut” përmes udhëkryqit në lagjen “ Tabahane” ,mund të kyçen në rrugët e lagjes ” Jeni Mëhallë” në drejtim të lagjeve tjera./TV Prizreni/