Ish nënkryetari i Lidhjes Demokratike të Kosovës, Eqrem Kryeziu vlerëson se në të gjitha aspektet, kjo qeverisje është fatkeqësi për Kosovën dhe për këtë, sipas tij, nuk ka pse të numërohen argumentet për t’i bindur qytetarët për këtë pasi është lehtësisht e dallueshme.
Kryeziu në një prononcim për ‘Indeksonline’, ka thënë se kjo qeveri prej fillimit po përpiqet t’i shmangë problemet, e jo t’i zgjidhë ato.
“Kam folë për synimin antikorrupsion si kushti i vetëm i çdo koalicioni, jo me vija të kuqe, që edhe ashtu doli të jetë një rrenë e turpshme”, ka thënë ai.
“Madje, shikoni absurdin e burrnimit tonë: Thuhet se korrupsion nuk ka, se qenka çështje e perceptimit të shtrembër. Ndërkaq, kur Kosovën e vizitojnë autoritetet e larta perëndimore dhe korrupsionin e theksojnë si problemin më të mprehtë, meshkujt tanë premtojnë se do ta luftojnë, duke harruar se mohonin të ketë korrupsion”, ka thënë Kryeziu.
LDK, më këtë lidërship, sipas tij, e ka hallin e pushtetit dhe për ta nuk ka rëndësi kush është partner në qeverisje.
“Në qoftë se nuk shfaqen struktura të tjera, nuk e besoj se këta bukurosha mund ta reformojnë vetveten. Kur je në pushtet nuk reformohesh kurrë, përkundrazi – degjenerohesh gjithnjë e më shumë, në mënyrë të pandalshme e të pashmangshme”, ka shtuar Kryeziu.
Kryeziu, përveç pozitës se nënkryetarit ka mbajtur edhe poste tjera në kuadër të Lidhjes Demokratike të Kosovës. Për disa legjislatura ai ishte deputet i kësaj partie./Indeksonline/