Sot në gjithë Kosovën fillon viti i ri shkollor 2013-2014. Sipas të dhënave të Ministrisë së Arsimit, Shkencës dhe Teknologjisë, mësimi fillor dhe i mesëm në nivel vendi zhvillohet në 1113 objekte shkollore, ku do të vijojnë mësimin mbi 420 mijë nxënës dhe 28 mijë mësimdhënës.
Klasën e parë do ta fillojnë 29 mijë nxënës. Drejtori i Administratës së Arsimit Parauniversitar, Alush Istogu ka pohuar se MAShT, në bashkëpunim me Drejtoritë Komunale të Arsimit kanë bërë të gjitha përgatitjet e duhura administrative dhe profesionale për vitin e ri shkollorë, i cili do të nis më 2 shtator.
Ndërkohë, këtë vit do të fillojë pilotimi i Kurikulës së Re të Arsimit Parauniversitar, në 10 shkolla, në nivel vendi, transmeton KP.
Viteve të fundit, sistemi i arsimit në Kosovë, është ballafaquar me probleme nga më të ndryshmet. Sipas prindërve të nxënësve, ekspertëve të arsimit dhe përfaqësuesve të opozitës, problemet fillojnë nga cilësia e arsimit, klasat e mbipopulluara, politizimi i strukturave udhëheqëse të shkollave, e deri te mosaplikimi i kurikulave të Republikës së Kosovës në nivel vendi.