Mungesa e të akuzuarës për lëndim të lehtë trupor dhe kansoje, E. Gj. , bëri që shqyrtimi i dytë i paraprë të mbahej të hënën, të shtyhet për muajin tjetër.
Prezent në këtë shqyrtim ishte prokurori Faton Ajvazi.
Ndërkaq, në mungesë të të akuzuarës, gjykatësi Refki Piraj e caktoi seancën e radhës për 12 maj 2017, në ora 10:30.
Sipas aktakuzës, E. Gj. me 20 nëntor 2016, rreth orës 11:30, në lokalin “Ardijani” në Prizren, fillon të përleshet me pronaren e lokalit në fjalë, tani të dëmtuarën J. V. . E njëjta fillimisht përleshet me fjalë, e më pas e kap për fyti, duke i shkaktuar lëndime të lehta trupore me dëmtim të përkoshëm të shëndetit.
Poashtu në ditën dhe vendin kritik, e akuzuara kishte kanosur të dëmtuarën me fjalët “ kur të dilni natën do t’ju vrasë, e do ta shihni se kush jam unë”, ku të dëmtuares i shkakton frikë, ankth dhe pasiguri.
E. Gj. akuzohet për veprën penale “ lëndim i lehtë trupor ” nga neni 188, paragrafi 1, të Kodit të ri Penal të Republikës së Kosovës, e cila dënohet me gjobë ose me burgim deri në një vit, si dhe për veprën penale “ kanosje ” nga neni 185, paragrafi 2, të Kodit të ri Penal të Republikës së Kosovës, e cila dënohet me gjobë ose me burgim deri në një vit./betimiperdrejtesi/