Partia Demokratike e Kosovës (PDK) në Prizren, pritet që sot të emërojë kandidatin për kryetar të Komunës. Lideri i PDK-së, Hashim Thaçi do të qëndrojë edhe sot në Prizren, për të përmbyllur “maratonën” e zgjedhjes së kryetarit të Degës dhe kandidatit për Prizrenin.
Përkundër përpjekjeve, Thaçi dje nuk ka arrit që t’i zgjidh përçarjet dhe problemet që ka PDK-ja në Prizren. Zgjedhja e kandidatit për Prizren, ka mbetur që të negociohet edhe sot.
Burimet e “PrizrenPress-it” bëjnë të ditur se brenda PDK-së në Prizren ekziston një pakënaqësi e madhe rreth mënyrës së zgjedhjes së kryetarit të Degës dhe kandidatit për kryetar të Prizrenit.
“Po besojmë se sot do të zgjidhen edhe kryetari i Degës edhe kandidati për kryetar të Prizrenit” tregon burimi i “PrizrenPress-it”.
Thaçi dje ka qëndruar në Prizren. Ai ka zhvilluar disa takime edhe me partitë e minoriteteve nga të cilët ka kërkuar që të mbështesin PDK-në në Prizren. /PrizrenPress.com/