Nënkryetari i LDK-së, Avdullah Hoti, ka reaguar ndaj deklaratës së kandidatit të PDK-së për kryetar të Prizrenit, Ramadan Muja, për parashikimin që ka bërë sot se do të fitojë pa balotazh.
“Ramadan Muja në Prizren thotë se e fiton Prizrenin pa balotazh. Si mund ta dijë ai rezultatin zgjedhor paraprakisht? Është vetëm një mundësi – e dinë sa vota do të vjedhet, sikur që kanë vepruar herën e kaluar. Por, ai dhe shërbyesit e tij ta kenë të qartë se LDK-ja nuk do të lejojë manipulimin e votave. Personat e tillë do të përballen me ligjin”, shkruan Hoti në Facebook.
Sipas tij, komisionarët dhe vëzhguesit e LDK-së në vendvotime do të jenë të vendosur për të mos lejuar manipulimin e vullnetit të qytetarëve. “Qytetarët e Prizrenit besoj thellë se do të jenë të vëmendshëm që të mos i votojnë këta persona që e ka degraduar Administratën Komunale të një qyteti që është themeli dhe ikona e qytetërimit dhe kulturës të mbarë shqiptarëve”, shkruan Hoti./PrizrenPress.com/