Kandidati i LDK-së për kryetar të Prizrenit, Eqrem Kryeziu është i bindur se fitorja e LDK-së në zgjedhjet e nëntorit do të jetë e pakontestueshme.
“Fitorja e LDK-së kësaj here përveç se do të jetë e pa kontestueshme ajo do të mbrohet me secilin çmim. Sepse vullneti i qytetarëve duhet të shkojë në vend dhe të respektohet”, ka thënë Kryeziu në përurimin e zyrës se nëndegës së LDK-së në lagjen “Ganimete Tërbeshi” në Prizren.
Ai i ka falënderuar aktivistët për këtë nismë, që sipas tij, do të jetë model për organizimet e ardshme të nëndegëve dhe shtabeve nëpër bashkësitë e tjera lokale.
Lidhja Demokratike e Kosovës (LDK) ka hapur sot zyrën e nëndegës në lagjen “ Ganimete Tërbeshi” në Prizren. Përveç aktivistëve të kësaj nëndege në ceremoni ka marrë pjesë edhe kryetari i Degës dhe kandidati për kryetar të Prizrenit,Eqrem Kryeziu.
Viosa Gashi, kryetare e nëndegës dhe kandidate e LDK-së për Asamblenë Komunale në Prizren, u shprehë shumë e kënaqur me ekipin fitues të nëndegës së LDK-së, i cili sic tha ajo është i përbërë nga aktivistë të dalluar.
“LDK-ja në këtë nëndegë në të gjitha zgjedhjet ka dalë fituese. Por, kësaj here jemi të përkushtuar të fitojmë bindshëm”, tha Gashi.
Ajo falënderoi lidershipin e LDK-së për mbështetje që i ka dhënë deri më tash./PrizrenPress.com/