Lëvizja Vetëvendosje akuzon PDK- në në Prizren se nuk ka hequr dorë nga manipulimet në ditën e zgjedhjeve
“Sa më shumë që po afrohet fundi i procesit zgjedhor i ditës së sotme, PDK-ja në Prizren po përdor tërë arsenalin e vet tashmë të njohur për të bërë presion ndaj qytetarëve të cilët kanë vendosur të shkojnë për të votuar”, thuhet në komunikatën e VV-së.
“Lëvizja Vetëvendosje! -Prizren reagon ndaj parregullsive të cilat po i shoqërojnë këto zgjedhje lokale në Komunën e Prizrenit. Këto parregullsi po e vërtetje edhe një herë faktin se PDK-ja ka mbetur ajo e vjetra dhe se nuk ka hequr dorë nga manipulimet në ditën e zgjedhjeve”.
“Sipas raportimeve nga komisionerët dhe vëzhguesit tanë në vendvotime, gjatë votimit është bërë fotografimi i votës”.
“Gjatë kohës së votimit, në afërsi të SHMLT “11 Marsi” në Prizren, janë vërejtur persona duke shkëmbyer letërnjoftime”.
“Në oborrin e SHMLT “11 Marsi”, dy zyrtarë të PDK-së janë vërejtur, se në cilësinë e vëzhguesve, kanë bërë presion tek qytetarët teksa hynin për të votuar në këtë qendër votimi”.
“Afër Qendrës së Votimit Nr. 2003 A, në shkollën fillore “Abdyl Frashëri”, në Ortakoll, janë vërejtur posterë të kandidatëve të LDK-së dhe të PDK-së”.
“Në shkollën fillore “Mustafa Bakiu” në vendvotimin numër 2005X , dhoma numër 2, ka patur imponim të votës nga ana e shoqëruesit”.
“Në Qendrën e Votimit 2004 në Kurillë, është bërë fotografimi i votës”.
“Në Jabllanicë janë evidentuar shumë raste të votimit me asistencë”.
“Në disa vendvotime, dhënësit e fletëvotimeve kanë bërë vulosjen e tyre në këndin e fletëvotimit, pikërisht aty ku është e vendosur llogoja e Lëvizjes Vetëvendosje!, edhe pse me rregullore do të duhej të vulosej në mes”./PrizrenPress.com/