Gjykata Themelore në Prizren, të enjten, e ka dënuar me gjashtë muaj burgim dhe me një mijë euro gjobë, zyrtarin policor Kujtim Kryeziu, i akuzuar për marrje të ryshfetit.
Atij, gjithashtu i është ndaluar edhe ushtrimi i funksioneve në Policinë e Kosovës në afat prej dy vjetësh.
Krahas Kryeziut, akuzohej edhe zyrtarja policore Lindita Haxhaj, por e cila është liruar nga akuza për marrje të ryshfetit.
Pas shpalljes së aktgjykimit nga gjykatësi Skender Çoçaj, mbrojtësi i tashmë të dënuarit Kryeziu, avokati Bestar Kolgeci, i ka kërkuar trupit gjykues që dënimin me burg t’ia zëvendësoi në dënim me gjobë.
Ky propozim është aprovuar nga trupi gjykues, me ç’rast Kryeziut, dënimi me burg i është zëvendësuar në dënim me gjobë në shumën prej 3.000 euro. Pas kësaj, atij i është shqiptuar dënimi unik me gjobë në shumë prej 4.000 euro, i cili duhet të paguaj në afatin prej dy muajsh pas plotfuqishmërisë së aktgjykimit.
I akuzuari Kujtim Kryeziu, e kishte pranuar fajësinë gjatë shqyrtimit të mbajtur më 12 dhjetor 2017, ndërsa ishte deklaruar e pafajshme e akuzuara Lindita Haxhaj.
Zyrtarët policorë Kryeziu dhe Haxhaj, akuzoheshin se më 3 shkurt 2017, në Prizren, kanë ndaluar një qytetar për kundërvajtje dhe nga i njëjti kanë kërkuar ryshfet për të mos i shqiptuar dënimin me gjobë.
Sipas aktakuzës, i akuzuari Kujtim Kryeziu i ka thënë qytetarit të ndaluar që të vendosë 15 euro në librezën e makinës dhe t’ia sjellë atij. Ai akuzohej se pasi që qytetari ka vepruar sipas udhëzimeve, ai është liruar të vazhdojë rrugën pa u dënuar. Kujtim Kryeziu, gjithnjë sipas aktakuzës, nga paratë e marra, ia kishte dhënë 5 euro të akuzuarës Lindita Haxhaj./betimiperdrejtesi/