Kryetari i Prizrenit, Mytaher Haskuka, kërkon nga mësimdhënësit pensionistë që të mos e padisin Komunën për mospagesën përcjellëse dhe shpërblimin jubilar.
Ai, premton se pagesa e pagave do të bëhet pas rishikimit të buxhetit.
“Kam kërkuar nga drejtori i Arsimit, që përmes sindikatave të ndikojnë te mësimdhënësit pensionistë që mos na padisin, sepse pagat e parapara me ligj do t’i marrin pas rishikimit të buxhetit”, tha Haskuka, shkruan “PrizrenPress”.
Mbi 30 mësimdhënës pensionistë kanë paditur Drejtorinë e Arsimit në Prizren, për mos zbatim të Kontratës Kolektive për Arsimin Parauniversitar.
Ata, përmes organeve të drejtësisë, po kërkojnë zbatimin e kësaj kontrate, përkatësisht pjesën për pagesën përcjellëse dhe shpërblimin jubilar.
Zëdhënësja e Gjykatës Themelore në Prizren, Afërdita Kicaj, konfirmon se mësimdhënësit që kanë dal në pension, kanë ngritur padi ndaj Drejtorisë së Arsimit.
Kryetari i Prizrenit, Mytaher Haskuka tha ndërkaq se mësimdhënësit pensionistë duke kërkuar të drejtën e tyre, po e dëmtojnë buxhetin e Komunës.
“Unë kërkoj nga mësimdhënësit që mos të na padisin, sepse pagat do t’i marrin.Këtë ua garanton ligji dhe unë do ta respektoj ligjin”, tha Haskuka.
“Komuna po dëmtohet nga paditë e mësimdhënësve, sepse po detyrohemi t’i paguajmë edhe shpenzimet e gjykatës”.
Kontrata Kolektive për Arsimin Parauniversitar, ia mundëson pensionistëve që t’i marrin deri në 6 paga në emër të pagave përcjellëse dhe asaj jubilare./PrizrenPress.com/