Ndeshja e cila mund t’i sjell trofeun e vetëm për këtë sezon si Manchester United, e po ashtu edhe Chelseat, zhvillohet nesër (e shtunë) në finalen e FA Cup në “Wembley”.
Zakonisht para ndeshjeve të tilla, trajneri i United, Jose Mourinho, në të kaluarën bënte lojëra fjalësh me trajnerët e ekipit kundërshtarë, e sidomos kjo gjë nuk ka munguar pikërisht edhe kundër teknikun italian të “Bluve” të Londrës, Antonio Conte.
E gjitha kishte filluar sezonin e kaluar pas fitores së Chelseat ndaj Man.United me rezultat 4-0 në “Stamford Bridge” dhe kishte vazhduar edhe këtë edicion, kur Conte e kishte quajtur të çmendur Mourinhon, kurse portugezi ia kishte kthyer me cinizëm duke ia përmendur skandalin e trukimeve në Serie A ku ishte përfshirë edhe Conte me Juventus asokohe.
Mirëpo, duket se Mourinho është qetësuar dhe ka deklaruar se më nuk do të ketë “kacafytje” përmes fjalëve me teknikun italian për finalen e nesërme të Kupës FA.
I pyetur për raportet e tij me Antonio Conten, portugezi në një intervistë për një gazetë portugeze kishte thënë se, gjithçka është në rregull dhe i kanë zgjatur dorën njëri tjetrit, për ta ndërprerë këtë gjë.
“Pas ndeshjes në Manchester, e kam ftuar në zyrën time dhe kemi biseduar. Gjithçka është rregulluar dhe e kemi tejkaluar atë pjesë sepse filloi të bëhej e mërzitshme”, tha Mourinho.
Ndeshja e finales së FA Cup në mes Manchester United dhe Chelsea, zhvillohet nesër (e shtunë) me fillim në ora 18:15 në stadiumin “Wembley” të Londrës. /I