Gjykimi i kryetarit të Prizrenit, Ramadan Muja dhe pesë drejtorëve të tij, është shty për muajin e ardhshëm. Ruzhdi Berisha, avokat mbrojtës i Mujës tha se shtyrja e gjykimeve është bërë për shkak problemeve shëndetësore të klientit të tij.
“ Për shkak të gjendjes shëndetësore të Mujës, gjykimi është shtyrë për tetor ”, tha Berisha për “PrizrenPress”. Sipas tij, gjykimi ndaj kryetarit Muja dhe pesë drejtorëve të tij, do të fillojë me 10 tetor të këtij viti.
Muja javën e kaluar nuk është paraqitur në Gjykatën Themelore. Ai për shkaqe shëndetësore nuk ka mundë të marrë pjesë në gjykimin e radhës.
Kryetarit të Prizrenit, Ramadan Muja, i rëndon një aktakuzë 21 faqesh, me të cilën ai dhe Sadik Paçarizi – drejtor i Urbanizmit dhe Planifikimit Hapësinor, Avni Ademaj – ish-u.d. së drejtorit të Gjeodezisë dhe Kadastrës, Kadri Ukimeri – ish-drejtor i Gjeodezisë dhe Kadastrës, Abdullah Tejeci – drejtor aktual i Gjeodezisë dhe Kadastrës dhe Minir Krasniqi – drejtor i Administratës, akuzohen për shpërdorim të pozitës zyrtare në dhënien e disa pronave shoqërore në shfrytëzim për disa kompani, me qëllim të përfitimit personal. /PrizrenPress.com/