Një grua është arrestuar si e dyshuar për vrasjen e një personi në automjetin e tij gjatë muajit gusht në Lladrovc të Malishevës.
“Me datën 4 gusht 2018, në fshatin Lladrovc të Malishevës është gjetur trupi i pajetë i viktimës S. B. 57 vjeçar. Nga këqyrja e vendit të ngjarjes është konstatuar se viktima ishte vrarë me armë zjarri në automjetin e tij”, thuhet në njoftimin e Policisë së Kosovës.
“Kjo vrasje ishte enigmatike dhe Policia në bashkëpunim me prokurorin e shtetit ka marrë një seri veprimesh operativo-hetimore me qëllim të zbulimit të këtij rasti”, thuhet në njoftim.
Më 18 shtator Policia kishte arrestuar një person si të dyshuar, por pas vazhdimit të hetimeve, në bazë të provave, është arrestuar N.RR, 51-vjeçare si e dyshuar për vrasjen e tij.
Po ashtu në cilësi të provës materiale është gjetur dhe është konfiskuar arma e zjarrit me të cilën dyshohet se është kryer vepra.
Me urdhër të prokurorit të shtetit të dyshuarës i është caktuar masa e ndalimit policor prej 48 orësh.