Kryeministri i Shqipërisë, Edi Rama në Asamblenë e Përgjithshme e Kombeve të Bashkuara shprehu bindjen se marrëveshja mes Kosovës dhe Serbisë ka shënuar fillimin e një epokë të re në rajon. “Dialogu Prishtinë-Beograd është një akt kuraje dhe mençurie si nga Kosova dhe Serbia dhe sfidon vendet e rajonit për të mobilizuar përpjekjet për mënyra të reja bashkëpunimi që i shërbejnë ripërtëritjes ekonomike të Ballkanit drejt rrugës për në Bashkimin Evropian”, ka theksuar Rama.
Rama shprehu angazhimin e vendit të tij për paqen dhe begatinë në rajon. Ai u bëri thirrje vendeve që nuk e kanë njohur ende pavarësinë e Kosovës që ta njohin atë.
Kryeministri shqiptar u ndal te imazhi i vendit të tij dhe problemet kryesore si korrupsioni. Ai tha se kjo ndikon tek investimet dhe përparimet e vendit të tij.
“Korrupsioni mund dhe duhet të mundet nëse ne kërkojmë të ndërtojmë ekonominë dhe sundimin e ligjit për të cilat kemi nevojë, për investimet dhe nxitjen e turizmit”, ka thënë ai. Rama shprehu angazhimin në luftën kundër korrupsionit. Kryeministri shqiptar u ndal po ashtu edhe tek aspiratat e vendit të tij drejt Bashkimit Evropian.
“Vizioni im për Shqipërinë”, përfundoi Rama, është po ashtu një vizion bashkëpunimi në Ballkan, duke sfiduar të kaluarën historike të luftrave dhe konflikteve.