Lidershipi i Komunës së Prizrenit sërish ka shprehur pakënaqësinë me efikasitetin e Gjykatës Themelore të Prizrenit në trajtimin e lëndëve të dërguara nga Inspektorati komunal. Ekzekutivi lokal ka shprehur qëndrimin se 80 për qind të këtyre rasteve nuk procedohen nga gjyqësori, gjë që sipas autoriteteve komunale shkakton problem në aspektin e zbatimit të ligjit.
Por drejtuesit e Gjykatës Themelore të Prizrenit i kanë hedhur poshtë këto pretendime, duke shprehur qëndrimin se kjo gjykatë është më efikasja në nivel vendi sa u përket padive civile. Në të njëjtën kohë kanë pohuar se menaxhmenti i Komunës së Prizrenit mund t’i paraqesë edhe drejtpërdrejt të gjitha shqetësimet në këtë drejtim, shkruan sot Koha Ditore.
Ankesa e kryetarit Mytaher Haskuka lidhur me angazhimin e Gjykatës është paraqitur në seancën e fundit të Kuvendit të Komunës së Prizrenit, teksa shefi i ekzekutivit lokal u përgjigjej shqetësimeve të paraqitura nga këshilltarët opozitarë lidhur me punën e Qeverisë komunale.