Mjeku nga Prizreni, Rrahim Ymeri, i cili është shfaqur në një video duke përdorur gjuhë të rëndë ndaj pacientes së tij, ka thënë sot se për fjalorin që ka përdorur ka marrë leje nga prindërit e vajzës paciente.
Ymeri duke i mohuar të gjithë akuzat. Madje, ai ka arsyetuar edhe tonin e lartë të përdorur duke thënë se ka marrë leje nga prindi, në mënyrë që pacientja të jetë më e qetë.
“Është e vërtetë që unë kam përdorur fjalor pak të ashpër por ky fjalor është bë me kërkesë të babait të pacientes, i cili nga unë ka kërkuar që të kem tonë më të ngritur që pacientja të jetë me qetë dhe të dëgjohen këshillat, e në atë kohë babai i pacientes ka qenë në korridor”, është shprehur kirurgu nga Prizreni për Indeksonline.
Kurse, akuzat e familjarëve që mantel bardhi ka marrë 200 euro në këmbim që të fuste në operacion pacienten e cila vuante nga e ashtu quajtura “zorra qorre”, Ymeri i ka mohuar.
“Nuk është e vërtetë që e kam kushtëzuar operacionin me dhënien e mitos, e as nuk kam marrë 200 euro”, ka thënë ai.
Për t’u futur në operacion, pacientes iu desh të duronte dhimbjet për disa orë, pasi kirurgu Ymeri nuk pranonte ta operonte, e gjithë kjo sipas pacientes dhe familjarëve të saj, në kërkim të parave.
Familjarët e pacientes deklaruan dje se u detyruan që t’i jepnin doktorit në fjalë 200 euro, si mundësi për t’u futur në operim.