Partia Konservatore e Kosovës ditën e dytë të fushatës e zhvilloi me aktivitete dhe takime të shumta, duke u shoqëruar me qytetarët e Prizrenit dhe duke prezantuar edhe ofertën e saj shoqatave që veprojnë në Prizren.
Kryetari i partisë Munir Basha, kandidati për kryetar Beni Kizolli dhe një pjesë e kandidatëve për Asamblenë Komunale, sot vizituan Shoqatën e Zejtarëve dhe Afaristëve të Kosovës në Prizren, me ç`rast u pritën nga kryetari i shoqatës Afrim Tejeci së bashku me zejtarët dhe afaristët e shumtë të qytetit të Prizrenit.
Kryetari i Shoqatës, Tejeci edhe në këtë takim shprehi kërkesat, shqetësimet, dhe nevojat që i preokupojnë zejtarët dhe afaristët e Prizrenit.
Kryetari i PK-së, Munir Basha tha ndërkaq se qëllimi i vizitës është pikërisht ofrimi i bashkëpunimit me Shoqatën e Zejtarëve dhe Afaristëve. “ Ne konsiderojmë se zhvillimi i duhur ekonomik duhet të planifikohet dhe realizohet në bashkëpunim me shoqata të tilla”, tha Basha. Ai premtoi se pas zgjedhjeve të 3 nëntorit do të jenë në shërbim të politikës së drejtë dhe bashkëpunuese me të gjithë afaristët e Prizrenit.
Edhe kandidati për kryetar Beni Kizolli, duke falënderuar, Tejecin për mikpritje premtoi se do të japin maksimumin në rrugën e drejtë të zhvillimit ekonomik, premtoi se në periudhën e shpejtë pas ardhjes në pushtet duke siguruar përkrahje nga partnerët strategjik, do të punojnë për ndërtimin e zonës industriale duke filluar me hapësirën prej 200.000 m2, 100 veprimtari dhe premtoi sigurimin e 1000 vendeve të punës për qytetarët e Prizrenit./PrizrenPress.com/