Ministri i Punëve të Jashtme i Kosovës, Enver Hoxhaj, ka pritur të mërkurën në takim ministrin për Tregti dhe Çështje Evropiane të Danimarkës, Nick Hækkerup, i cili po qëndron për një vizitë zyrtare në Kosovë.
Gjatë takimit, ministri Hoxhaj e njoftoi ministrin Hækkerup për progresin në Kosovë, për forcimin e shtetësisë, të subjektivitetit ndërkombëtar dhe veçanërisht për progresin konkret në rrugën drejt anëtarësimit në Bashkimin Evropian.
Duke iu referuar hapjes së negociatave për Marrëveshjen e Stabilizim Asociimit, Hoxhaj ka veçuar angazhimin e fuqishëm të Qeverisë së Kosovës për përmbushjen e agjendës integruese evropiane.
Hoxhaj theksoi se Qeveria e Kosovës përmes përmbushjes të të gjitha kritereve të nevojshme, synon avancimin e shpejtë në proceset integruese dhe anëtarësimin e plotë në familjen evropiane.
Ministri i Jashtëm kosovar ka shprehur mirënjohjen e popullit dhe Qeverisë së Kosovës për përkrahjen e madhe të Danimarkës në të gjitha proceset, duke kërkuar mbështetje të mëtejshme në proceset integruese.
Hoxhaj po ashtu vlerësoi lartë bashkëpunimin bilateral ndërmjet dy shteteve, duke theksuar vullnetin e Qeverisë së Kosovës për fuqizimin e gjithanshëm të shkëmbimeve me Danimarkën.
Ministri për Tregti dhe Çështje Evropiane i Danimarkës, Nick Hækkerup, uroi ministrin Hoxhaj për hapjen e negociatave për Marrëveshjen e Stabilizim Asociimit, duke shprehur mbështetjen e mëtutjeshme të Danimarkës për proceset integruese të Kosovës.
Ministri Hækkerup po ashtu konfirmoi vullnetin e shtetit danez për fuqizimin e bashkëpunimit bilateral me Republikën e Kosovës./PrizrenPress.com/