Kryeministri Avdullah Hoti ka thënë se nuk dihet akoma se cila është agjenda e takimit mes Kosovës dhe Serbisë të ftuar nga SHBA-të javën e ardhshme.
Megjithatë, ai ka insistuar se ajo që dihet qartë është pozicioni i Qeverisë së Kosovës.
“Atë që mund ta bëj të qartë dhe është e gjitha çfarë mund të bëj të qartë: Qëndrimin e Qeverisë së Kosovës e kam prezantuar para ambasadorëve të QUINT-it, që përfaqësojnë vendet kyçe në këtë proces, dhe mbi bazën e qëndrimit për procesin e dialogut të Qeverisë së Kosovës ne ftohemi në takimin e Washingtonit më 27 qershor. Mbetet që të ulemi në tavolinë dhe të shohim se ku shkojmë përtej këtij takimi”.
“Nuk ka agjendë dhe tema ende, dihet vetëm pozicioni i Qeverisë së Kosovës që është mirëkuptuar nga partnerët tanë ndërkombëtarë”.
A mund të prodhojë takimi i 27 qershorit një marrëveshje finale Kosovë-Serbi?
“Besoj që duke pasë parasysh kompleksitetin e çështjes nuk është marrëveshje që mund të përmbyllet me një takim. Nëse brenda këtij takimi ne mund të merremi vesh për parimet e zhvillimit dialogut do të ishte shumë mirë, sepse na trason rrugën për më tutje”.
Kryeministri Avdullah Hoti këto komente i ka bërë në diskutimin “Cila është platforma e Qeverisë së Kosovës në dialogun me Serbinë?” të ftuar nga Instituti Demokratik i Kosovës (KDI).