Janë bërë më shumë se një vit nga vdekja e nënës së A. H.
Hatije Dina vdiq në moshën 54-vjeçare në rrethana të dyshimta, të cilat gishtin e fajësisë e çojnë kah bashkëshorti i saj, Ilir Haxhiaj.
Kur A.H. ishte kthyer nga puna, pasditen e 31 majit të vitit të kaluar, nuk e kishte gjetur askënd në shtëpi.
Derisa ishte duke kërkuar nënën, të afërmit i kishin thënë që gjatë ditës kishin dëgjuar zhurma e britma të kenë dalë nga aty.
Por, për të zhurma e britmat ishin normale.
Ai është i bindur se nëna e tij ka vdekur nga plagët që ia ka shkaktuar bashkëshorti i saj, Haxhiaj, të cilin A.H nuk e ka baba biologjik.
Dhe një bindje të tillë e ka paraqitur edhe në dëshminë e tij dhënë para Prokurorisë në Prizren, për çka pret që drejtësia t’ia japë dënimin e merituar.
Por, që nga ajo kohë ai nuk banon në shtëpinë e Ilir Hazirajt, pasi ndihet i kërcënuar, e derisa përkohësisht është duke qëndruar te familjarët, pret që Komuna t’ia ofrojë një vend të sigurt banimi.
Ilir Haxhiaj, nga Prokuroria në Prizren është akuzuar vetëm për veprën penale “lëndim i rëndë trupor’, pavarësisht insistimit të familjes dhe mbrojtjes së viktimës, që duke i marrë parasysh rrethanat e rastit, ai të akuzohet për veprën “Vrasje e rëndë”.
Në aktakuzën e ngritur ndaj tij, thuhet se Haziraj, duke shkuar në një fshat të Suharekës, pas mosmarrëveshjeve që kanë pasur me bashkëshorten e tij, ka ndaluar veturën dhe me forcë e ka nxjerrë jashtë dhe ka filluar ta sulmojë fizikisht duke e grushtuar nëpër të gjitha pjesët e trupit.
Më tutje në aktakuzë shkruan se kur e ndjera është rrëzuar në asfalt, ia kap kokën dhe disa herë e godet për asfalti, ku si rrjedhojë i shkakton lëndime të rënda dhe trauma të shumëfishuara në kokë, gjoks, shpinë e duar, derisa edhe raportet mjekësore kanë konstatuar se ajo ka vdekur dy javë më vonë në QKUK, nga po të njëjtat lëndime.
Në seancën e zhvilluar më 16 shtator, derisa pritej fjala përfundimtare nga palët, gjykimi është shtyrë pas paraqitjes së provave te reja nga ana e Prokurorisë./KTV