Koalicioni i AKR-së dhe PDK-së, nuk ka zgjatur më shumë se dy ditë në Prizren. Presidenti i AKR-së Behxhet Pacolli, nuk dëshiron që partia e tij, të përkrahë kandidatin e PDK-së për kryetar të Prizrenit, Ramadan Muja.” Pacolli është revoltuar që kemi lidhur koalicion me PDK-në”, tregon për “PrizrenPress”, me kusht anonimiteti një zyrtar i lartë i AKR-së në Prizren.
AKR-ja dhe PDK-ja, të shtunën kanë zyrtarizuar koalicionin për të mbështetur Ramadan Mujën për kryetar të Prizrenit. Sekretari i përgjithshëm i Degës së PDK-së në Prizren, Nijazi Kryeziu, nënshkrimin e këtij koalicioni e patë vlerësuar të rëndësishëm për PDK-në.
Burimet e “PrizrenPress-it” bëjnë të ditur se ky koalicion në mes AKR-së dhe PDK-së, është nënshkruar pa dijenin e Presidentit Behxhet Pacolli. ”Pacolli nuk ka qenë i informuar për këtë koalicion. Pasi ka marrë vesh ka reaguar dhe ka kërkuar që të prishet”.
Kryetari i Degës së AKR-së në Prizren, Naser Bresa, ndërkaq ka qenë i pamundur që të kontaktohet. Përkundër disa thirrjeve, ai nuk është lajmëruar në telefon.
Behxhet Pacolli ka kërcënuar Degën e partisë së tij në Prizren, që menjëherë publikisht ta shpallin të prishur koalicionin me PDK-në.
“Presidenti ka kërkuar nga ne që ta prishim koalicionin.Nëse ne nuk e prishim si degë, atëherë ai do ta prishë vetë”./PrizrenPress.com/
