Të mërkurën është arrestuar një person në fshatin Bubavec të Malishevës, pasi i njëjti dyshohet për keqtrajtim gjatë ushtrimit të detyrës zyrtare dhe autorizimeve publike.
Një gjë e tillë është bërë e ditur përmes raportit 24 orësh të Policisë së Kosovës.
Ndërsa sipas zëdhënësit të policisë për rajonin e Gjakovës Nysret Xhurkaj, i dyshuari është arrestuar nën dyshimet se i njëjti ka sulmuar fizikisht viktimën mashkull, i mitur.
“Në Stacionin Policorë në Malishevë është raportuar një rast që kishte ndodhur në shkollën e mesme te ulet, “Dëshmoret e Fshatit’’ në Bubavec. Patrulla e policisë ka shkuar ne atë lokacion, dhe lidhur me rastin ka kontaktuar arsimtarin, i njëjti është shoqëruar në Stacionin e Policisë në Malishevë dhe gjatë intervistimit ka deklaruar se ka pasur një problem me një nxënës të mitur të kësaj shkolle të cilin e kishte goditur me shuplak pasi që nxënësi ishte problematik edhe herëve të tjera”, tha Xhurkaj.
Ai shtoi se sa i përket viktimës nxënës, ai posedon raport mjekësor dhe sipas mjekut nuk ka lëndime trupore, dhe se nxënësi është intervistuar në prezencën e prindërit dhe zyrtarit të Qendrës për Punë Sociale në Malishevë.
Sipas Xhurkajt, i dyshuari pas konsultimit me prokurorin kujdestar është ndaluar për 48 orë në qendrën e mbajtjes. /BetimipërDrejtësi