Kryetari i LDK-së, Lumir Abdixhiku ka përkujtuar ish-kryetarin e Suharekës dhe veprimtarin e madh të LDK-së, Ukë Bytyçi.
“Sot u bën 19 vjet nga vrasja makabre e Ukë Bytyqit, veprimtarit të orëve të para të çështjes kombëtare, kryetarit të degës së LDK-së dhe Kryetarit të Suharekës. Ukë Bytyqi, tërë jetën ia kushtoi Kosovës. Në rrugëtimin tonë për liri, pavarësi dhe demokraci, ai ishte gjithmonë ndër të parët, kurdo dhe kudo që i duhej atdheut, edhe atëherë kur me pushkë duhej mbrojtur pragu i shtëpisë”, ka thënë Abdixhiku.
Abdixhiku ka theksuar se Ukë Bytyqi, me vullnetin dhe përkushtimin e pashoq kontribuoi edhe në krijimin e një kulture qeverisëse demokratike në nivel lokal.
“Gjersa po festonte fitoren e madhe të Lidhjes Demokratike të Kosovës në Suharekë, së bashku me aktivistë dhe qytetarë, ai u vra pabesisht nga dora kriminale që nuk ia donte të mirën komunës e atdheut. Kryetari emblematik i Suharekës, Ukë Bytyqi, mbetet figurë identifikuese e Lidhjes Demokratike të Kosovës, si njeri me vlera të larta njerëzore, i guximshëm e mbi të gjitha shumë modest”, u shpreh Abdixhiku.
Ai theksoi se kujtimi për kryetarin e Suharekës, Ukë Bytyqi është i përjetshëm. /Telegrafi/