Zyrtarët e Galerisë së Ministrisë së Kulturës njoftojnë se ekspozita u vizitua gjatë muajve nëntor dhe dhjetor prej rreth 700 vizitoreve vendas dhe të huaj.
Galeria e Ministrisë së Kulturës së Kosovës, në Prishtinë përuroi sot, katalogun e ekspozitës “Imazhi gjuhësor i piktorëve të hershëm tradicionalë në viset tona”, transmeton KultPlus. Kjo ekspozitë ishte e fundit në agjendën e Ministrisë për këtë vit, dhe atmosfera e saj rezultoi e suksesshme dhe e pëlqyer nga sistemi i arteve pamore të Kosovës dhe më gjerë. Kështu vlerësohet në një njoftim të galërisë së kësaj ministrie.
Në ekspozitë u prezantuan veprat e artistëve themelues të dy shkollave shqiptare, asaj të Vizatimit (1931) në Tiranë dhe shkollës së artit të Pejës (1949). U ekspozuan 24 vepra të gjinisë së portretit dhe portretit të kompozuar, të realizuara nga baballarët e pikturës laike shqiptare të fillimit të shek. XX dhe artistët nismëtar të pikturës së parë moderne shqiptare të Kosovës.
Zyrtarët e Galerisë njoftojnë se ekspozita u vizitua gjatë muajve nëntor dhe dhjetor prej rreth 700 vizitoreve vendas dhe të huaj, prej të cilëve ambasadorë, profesorë, artistë, studentë dhe dashamirës arti. Drejtuese e projektit ishte Dhurata Ramosaj Shala dhe kuratorja Suzana Varvarica Kuka.
Ekspozita u përkrah financiarisht nga Ministria e Kulturës e Kosovës dhe u mbështet fuqishëm nga ministri Memli Krasniqi, Mirela Kumbaro, ministre e Kulturës së Shqipërisë dhe stafet drejtuese dhe realizuese të dy Galerive Kombëtare të Artit, Kosovë dhe Shqipëri.