Kryeministri Albin Kurti ka pritur në takim një delegacion nga Unioni i Bizneseve Shqiptare-Gjermane, të drejtuar nga kryetari i këtij Unioni, Nazmi Viqa.
Kurti falënderoi delegacionin për angazhimin dhe kontributin që kanë dhënë si platformë ekonomike në mërgatë.
Shefi i Qeverisë foli për mundësitë që Kosova ofron për investime dhe i njoftoi për themelimin e Gjykatës Komerciale që pritet të funksionalizohet brenda dy muajve të ardhshëm, e që beson se do të rrisë sigurinë juridike për bizneset vendore dhe investimet e huaja.
Duke shprehur interesimin për të krijuar një partneritet të ngushtë me mërgatën, Kurti tha se mirëpret gjithë ndërmarrësit nga mërgata që bashkë edhe me partnerët e tyre ndërkombëtarë të investojnë në Kosovë, me prioritet në prodhim të produkteve.
Ndër të tjera, në takim ku ishte e pranishme ishte edhe zëvendësministrja Liza Gashi, u diskutua edhe për brengat dhe sfidat që kanë bizneset. /Klankosova.tv/